Njeriu vjen në jetë si një dhuratë e gëzim i jetës e vazhdimësisë së familjes e të shoqërisë.

Me kujdesin e dashurinë prindërore për t‘u rritur i shëndetshëm dhe i denjë për veten e shoqërinë, ai edukohet e aftësohet me arritjet më të mira të kohës.

Trashëgimia gjenetike, zgjuarsia, edukimi e mjedisi shoqëror dhe natyra janë elemente thelbësore për identitetin, zhvillimin e aftësive në jetë.

Fëmija orientohet natyrshëm në njohjen e jetës, dashurinë për nënën e babanë, motrat e vëllezërit, gjithë të afërmit, mëson të ndryshojë, të flasë, të ngrihet në këmbë, të ecë me guxim në rrugëtimin jetësor.

Më pas shkollohet me dijet bashkëkohore, aftësohet në profesionin që zgjedh apo që duhet të ketë sipas mundësive.

Edukimi, shkollimi, përvoja në rritje në punë ndikojnë në ndërgjegjësimin për përgjegjësinë ndaj vetes, familjes, shoqërisë, popullit e kombit që i përket dhe civilizimit në të cilin jeton e për misionin që ai i njeh vetes për të dëshmuar se cili është dhe si kërkohet të jetë për të realizuar detyrat në punën e përditshme, duke respektuar e zbatuar normat morale e ligjore.

Bindjet e ndërgjegjshme, mendimet e sinqerta dhe mbrojtja e së vërtetës që deklaron e bind në veprimtarinë e përditshme evidentojnë botën e brendshme, aftësitë e lindura e të edukuara, moralin e kontributin e tij.

Jeta e jetuar është e gjatë, e gëzueshme e me shumë përgjegjësi dhe njëkohësisht e pamjaftueshme për të dëshmuar tërësisht vlerat individuale e kontributin për familjen, shoqërinë e kombin.

Puna dhe rezultatet pozitive pa nënvleftësuar edhe të metat e dobësitë vlerësohen nga familja, shoqëria e shteti.

I lumtur, i qetë e i dobishëm është ai që është i sigurt në ndërgjegje se ka bërë më të mirën e mundshme.

Në mendjen e ndërgjegjen e familjes, të shoqërisë e të kombit mbeten nderimi i merituar për punën e arritjet në të mirën e përgjithshme.

Nderohen e kujtohen ata që kanë qenë shembull e burim motivimi për familjen, shoqërinë e shtetin. Të mirat nuk harrohen.

Ndëshkohen e kujtohen me urrejtje, nuk harrohen shpejt ata që kanë shkaktuar dhimbje, padrejtësi, krime, tradhti etj.