Romani Qetësi i Ilia Venezit merr shkas nga ngjarjet e dhimbshme të katastrofës së Azisë së Vogël dhe të shkëmbimit të popullsisë midis Greqisë dhe Turqisë. Është historia e një grupi refugjatësh nga Fokida që vendosen në zonën e shkretë të Anavisos, e luftës dhe e përpjekjeve të tyre për t’u përshtatur, për të filluar jetën nga e para. Atje ku “ka vetëm shkurre, gjembaçë dhe rërë”, ku “kriporet janë e vetmja shenjë që ekziston jetë njerëzore në këtë vend shterpë”, atje fokianët kërkojnë të gjejnë ëndrrat e tyre, “kimerat”, kërkojnë qëndrueshmërinë dhe vazhdimësinë, kërkojnë qetësinë. "Shikon çfarë bëj unë këtu?" e pyet Andrean doktor Veni. "Kërkoni kimera", i përgjigjet. "Jo vetëm ato, kërkoj qetësinë."